「手術成功，病人死亡」，應該係套戲嘅highlight 。
除咗梁朝偉同杜德智亦敵亦友之情寫得比較好之外，成套戲感覺太瑣碎。應該寫嘅地方講得唔夠深入，例如許志安處理善終病人遇到嘅矛盾、梁朝偉同鍾麗緹嘅感情發展，因篇幅所限亦未夠說服力；反而好多支線令到故事偏離，例如劉青雲童愛玲同埋梁詠琪等等同醫務無關嘅人物可以cut咗佢。
基於有UFO背景嘅關係，成套戲中產味好重。好多醫學院嘅場景用咗香港大學大學堂嚟拍，可以理解。即使講低下階層亦有陣陣離地中產嘅感覺。有乜可能教會搞福音會同嘉年華，場景同服裝都咁decent，對白連少少福音訊息都冇提，反而有黑人同鬼婆做背景？不過要讚嘅係，好多街景嘅鏡頭同埋燈光都做得好有舞台感，雖然誇張咗少少但藝術感十足。
